Mediaverklaring

DIE STAND VAN AFRIKAANS 

Die Verkennersbeweging van Suid-Afrika het kennis geneem van die ANC-President se skuldbelydenis oor die hantering van Afrikaans. Natuurlik is dit altyd verblydend as mense van hulle verkeerde weë tot inkeer kom. 

Ons kan ongelukkig nie heeltemal die optimisme van ander Afrikaanse organisasies deel oor hierdie swaeltjie wat in die middel van die winter verskyn nie.  Die Verkenners is van mening dat daar geen rede is vir enige onderhandeling of gesprekvoering oor die “beveiliging” van Afrikaans na pres. Mbeki se stelling nie, en dat dit selfs die saak kan verswak. 

Die feite is dat die ANC sedert sy bewindsoorname alles in sy vermoë gedoen het om Afrikaans, die Afrikanerkultuur en die Afrikaner af te kraak, te beskuldig en tot derderangse landsburger terug te druk.  Dit moet duidelik gestel word dat die taal nie van die breë Afrikanerkultuur geskei kan word nie.  Om net te kyk na die posisie van Afrikaans is dus nie voldoende nie en lyk na ‘n fopspeen waarmee die Afrikaners tevrede gehou moet word terwyl Pretoria Tshwane word, Pietersburg Polokwane en Transvaal versnipper is tot Gauteng, Mpumalanga en Limpopo.  Mbeki het immers self gesê dat hy bekommerd is dat die taalkwessie besig is om in ‘n versetbeweging omvorm te word.  Dit is duidelik dat hy versigtig is vir Afrikanerverset, en aan die ander kant bewys dit dat verset wel die gewenste resultate kan oplewer. 

Indien Mbeki en die ANC ernstig is oor Afrikaans, is dit hulle plig, en hulle plig alléén, om die taal se status te herstel tot waar dit was.  Gevolglik sal Mbeki persoonlik moet ingryp en toesien dat:

·                     die staat nie voortgaan om die Mikro Skool se saak verder op appél te neem na die Grondwetlike hof nie;

·                     universiteite soos Pretoria, Potchefstroom, Vrystaat en RAU hulle Afrikaanse karakter, wat deur die ANC-bewindhebbers van hulle gestroop is, terugkry;

·                     geen Afrikaanssprekende ooit weer die frustrasie sal ondervind om Engels by enige staatsdepartement te moet praat om enigsins geholpe te raak nie;

·                     alle amptelike dokumentasie en korrespondensie in Afrikaans beskikbaar sal wees;

·                     Afrikaans weer sy regmatige plek op die openbare uitsaaier sal inneem

·                     Afrikaanse plekname weer herstel sal word soos wat dit was, aangesien die taal en die breë kultuur onafskeibaar van mekaar is. 

Enigiets minder as dit sal in dieselfde lig beskou word as voorheen verbreekte beloftes oor taal, kultuur en minderheidsregte. 

Intussen sal die taalversetaksie versterk moet word en sal elke Afrikaner skouer aan die wiel moet sit om toe te sien dat ons taal behoue bly en ons regte afgedwing word. 

Henk van de Graaf

PRESIDENT: VERKENNERSBEWEGING VAN SUID-AFRIKA